Është vazhduar masa e paraburgimit edhe për 30 ditë ndaj tetë mjekësve dhe një tekniku mjekësor të cilët dyshohen se janë përfshirë në mashtrime të pacientëve me stenta duke i dërguar këtë të fundit nga QKUK-ja në klinika private.
KALLXO.com pati raportuar muajin e kaluar për shkëmbimin e mesazheve telefonike mes mjekëve të arrestuar të cilët bënin mashtrim me pacientët duke i dërguar nga QKUK-ja në spitale private e më pastaj duke marrë para prej 500 euro për këto shërbime.
Të dyshuar në këtë rast janë Lulzim Brovina, Borçe Petrovski, Ali Hocaogllu, Astrit Bakiqi, Nexhmi Zeqiri, Daut Gorani, Eefedin Muhaxheri, Murat Abazi dhe Reshat Emra.
Lajmin e ka konfirmuar për KALLXO.com, Besnik Berisha, avokati i Nexhmi Zeqirajt, shef i Njësisë Koronare në QKUK.
“Masa e paraburgimit është vazhduar edhe për 30 ditë bazuar në kërkesën e prokurorisë. Arsye ligjore për gjykatën është se akoma ekziston dyshimi i bazuar si rreziku i pengimit të procedurës, rreziku i ikjes dhe rreziku i përsëritjes së veprës penale”, tha avokati Berisha.
Mbrojtësi Berisha ka treguar se Prokurori special Besim Kelmendi ka bërë rikualifikim të veprës penale krim i organizuar.
“Pas intervistës së të pandehurve, prokuroria si duket ka reflektuar dhe e ka parë se ai kualifikim jo vetëm që ishte i pabazuar por ishte komplet absurd. Tani ka kualifikuar veprën krim i organizuar nga neni 283 paragrafi 2 që parasheh 10 vite burgim në nenin 283 në paragrafin 1 që parasheh 7 vite burgim. Kjo i bie se ka ndryshuar rolin e përfshirjes së të pandehurve por edhe vitet e dënimit ”, tha Berisha.
Mjekët e rastit “Stenta”, janë arrestuar më 9 tetor nga Policia e Kosovës ndërsa me 10 tetor atyre u është caktuar masa e paraburgimit prej 30 ditësh./Indeksonline/
Facebook
Twitter
Instagram
Google+
YouTube
RSS